«Нұр Отан» партиясы Доктринада айтылған ұлттық құндылықтарды сақтап, өскелең ұрпаққа жеткізуде мазмұнды жұмыс жүргізуде - С. Нұрбек
АСТАНА. 26 желтоқсан. ҚазАқпарат - Бүгін Бейбітшілік және келісім сарайында ұлттық спорт түрлерін дамыту мәселелерін талқылауға арналған жиында сөз алған «Нұр Отан» партиясы Қоғамдық саясат институтының директоры Саясат Нұрбек, ұлттық спорт түрлері - партия Доктринасында айтылған құндылықтарды сақтап, насихаттаумен қатар, халықты біріктіретінін жеткізді. Еске салайық, шара «Самұрық-Қазына» АҚ мен «Нұр Отан» партиясы, ҚР Ұлттық спорт түрлері қауымдастығы және өкілдері, сондай-ақ жаттықтырушылар, спортшылар мен ардагерлерінің қатысуымен өткен болатын.
«Бір кездері Қазақстан халқының 60 пайыздан астамы ауылдық жерлерде тұрса, қазір керісінше қалаларға қоныс аудару қарқын алып барады. Яғни, қоғамда урбанизация процесі жүруде. Қаладағы жастар өз ата-бабаларының салт-дәстүрінен, төл мәдениетінен ажырап қалмауы керек. Міне, осы мақсатпен ұлттық спорт ойындарын сақтап, ұмытыңқырап бара жатқан түрлерін уақыт көшіне сай дамытуды қолға алып жатырмыз», - деп атап өтті Саясат Нұрбек.
Оның айтуынша, алда еліміз үшін өте маңызды бір шара - «ЕХРО-2017» көрмесін өткізу баршамыздан үлкен дайындықты талап етеді. Көрмеге келген қонақтарға қазақ елінің болмысын, бай мәдениетін барша сән-салтанатымен көрсетуіміз қажет.
«Осы тұрғыдан, «Нұр Отан» партиясы Ұлттық спорт қауымдастығына ұлттық спорт ойындары дамытуға көмек көрсетуге дайын. Партия Доктринада айтылған ұлттық құндылықтарды сақтап, өскелең ұрпаққа жеткізуде мазмұнды жұмыс жүргізуде», - деді Саясат Нұрбек.
