Нұрбол Тұрашбеков Түркістан облысы әкімінің орынбасары болып тағайындалды
ТҮРКІСТАН. KAZINFORM- Қазақстан Республикасы Президенті Әкімшілігінің келісімі бойынша облыс әкімінің өкімімен Тұрашбеков Нұрбол Әбдісаттарұлы Түркістан облысы әкімінің орынбасары лауазымына тағайындалды.
Аппарат мәжілісінде Түркістан облысының әкімі Дархан Сатыбалды жаңа орынбасарды таныстырып, Түркістан облысын дамыту бағытында маңызды міндеттер жүктеліп отырғанын айтты. Алдағы жұмысына сәттілік тіледі.
Нұрбол Әбдісаттарұлы Тұрашбеков 1980 жылы Төлеби ауданында туған. 2000 жылы М.Әуезов атындағы Оңтүстік Қазақстан мемлекеттік университетін, 2005 жылы М.Дулати атындағы Тараз мемлекеттік университетін бітірген. Мамандығы инженер-экономист.
Еңбек жолын 2001 жылы Ордабасы ауданында жер кадастр бюросынан бастады. 2002 жылы Ордабасы аудандық жер-кадастрлық бюросының меңгерушісі, 2009 жылы Сайрам жер-кадастрлық бюросының директоры, 2010 жылы «Оңтүстік Қазақстан жерге орналастыру ғылыми-өңдірістік орталығы» еншілес мемлекеттік кәсіпорнының директоры, 2012 жылы (Астана қаласы) «Жерге орналастыру ғылыми-өңдірістік орталығы» республикалық мемлекеттік кәсіпорны бас директорының бірінші орынбасары қызметтерін атқарды. 2016 жылдың сәуір айынан бастап «Азаматтарға арналған үкімет» мемлекеттік корпорациясының «Жер кадастры ғылыми-өндірістік орталығы» дирекциясы директорының орынбасары, «Жер кадастры және жылжымайтын мүлікті техникалық тексеру» дирекциясы Мемлекеттік жер кадастры басқармасының басшысы лауазымында еңбек етті.
Бірнеше жауапты қызметтерде жұмыс істеген Нұрбол Тұрашбеков 2017-2020 жылдар аралығында Түлкібас ауданының әкімі, 2020 - 2021 жылдары Ордабасы ауданының әкімі болды. 2021 жылдың маусым айынан бері Түркістан қаласының әкімі лауазымын атқарып келді.
Нұрбол Тұрашбеков облыс әкімінің орынбасары ретінде ауыл шаруашылығы, жер қатынастары, ветеринария, табиғи ресурстар және табиғат пайдалануды реттеу салаларына жетекшілік етеді.
Айта кетейік, бұдан бұрын Түркістан қаласының Түркістан қаласының әкімі болып Әзімбек Пазылбекұлы тағайындалғанын жазған болатынбыз.
