Офицерлерге Сағадат Нұрмағамбетов атындағы кубок пен төсбелгі берілмек
АСТАНА. KAZINFORM – Қызметтік міндеттерін үлгілі орындағаны, шығармашылық белсенділігі, мінсіз қызметі және қызметтік істегі басқа да жетістіктері үшін әскери қызметшілерге «Халық Қаһарманы армия генералы Сағадат Қожахметұлы Нұрмағамбетов» кубогы мен төсбелгісі берілмек. Жаңа наградаға қатысты ресми құжат ашық НҚА порталында жарияланды.
Нақырақ айтқанда, Қорғаныс министрінің 2017 жылғы 16 тамыздағы «Дербестендірілген белгілердің, омырауға тағатын белгілердің және өзге де әскери-геральдикалық белгілердің, әскери оқу орындарын бітіргені туралы, сыныпты мамандарға арналған белгілердің, әскери-қолданбалы, қызметтік-қолданбалы, техникалық және басқа да спорттық іс-шаралардың жүлдегерлеріне арналған наградалық медальдардың (белгілердің) сипаттамасын, сондай-ақ оларды беру және Қарулы Күштері әскери қызметшілерінің тағып жүру тәртібін бекіту туралы» № 461 бұйрығына мынадай өзгерістер енгізіледі:
— «Халық Қаһарманы армия генералы Сағадат Қожахметұлы Нұрмағамбетов» кубогы кейіннен алтынды имитациялайтын (алтын, алтын түстес) қорғаныш жабын жағылып қоладан құйылып жасалады. Қалқандағы «АРМИЯ ГЕНЕРАЛЫ САҒАДАТ ҚОЖАХМЕТҰЛЫ НҰРМАҒАМБЕТОВ» деген жазулар мен «МІНДЕТ, АБЫРОЙ, ЕРЛІК» деген ұран жез пластинадан қалыптау жолымен жасалады, негізі — жылтыр, бедері — күңгірт. Кубок тұғырының төменгі бөлігінде наградталушының деректерін енгізуге арналған тақтайша жапсырылған. Кубоктың тұғыры қара көк түсті тастан жасалады. Негізінен биіктігі 300 мм құрайды. Ені — 115 мм.»;
— Қазақстан Республикасының тұңғыш Қорғаныс министрі «Халық Қаһарманы армия генералы Сағадат Қожахметұлы Нұрмағамбетов» төсбелгісі қызметтік міндеттерін үлгілі орындағаны, шығармашылық белсенділігі, мінсіз қызметі және қызметтік істегі басқа да жетістіктері үшін әскери қызметшілердің еңбегін ынталандыру мақсатында офицер құрамын наградтаудың ерекше түрі саналады.
Тұңғыш Қорғаныс министрінің төсбелгісімен наградтау үшін кандидаттарды іріктеуді оқу жылындағы қызметтік іс қорытындысы бойынша Қорғаныс министрлігі мен Қарулы күштері Бас штабы құрылымдық бөлімшелері басшыларының, әскер түрлері бас қолбасшыларының, өңірлік қолбасшылықтар әскерлері (әскер тектері) қолбасшыларының, бас басқармалар бастықтарының ұсынуы бойынша Қарулы күштері Бас штабының Жауынгерлік даярлық департаменті жүргізеді, содан кейін іріктеуден өткен кандидатура Қорғаныс министріне бекітуге енгізіледі.
Тұңғыш Қорғаныс министрінің төсбелгісімен оқу жылының қорытындысы бойынша жауынгерлік даярлықта, бөлімшеде әскери тәртіпті, қатаң жарғылық тәртіпті және әскердің жоғары жауынгерлік әзірлігін ұстауда қол жеткізген жетістігі (оқудағы және ғылыми жұмыстағы жетістігі) үшін бригада (полк, база) командирі және одан жоғары Қазақстан Республикасы Қарулы Күштерінің әскери қызметшілері наградталады. Төсбелгімен наградтау туралы Қорғаныс министрінің тиісті бұйрығы шығарылады. Белгімен қайта наградтау жүргізілмейді.
Бұған дейін «Айбын» орденінің әртүрлі дәрежелеріне Сағадат Нұрмағамбетов, Бауыржан Момышұлы және Рахымжан Қошқарбаев есімдері берілгенін жазған едік.
