ОҚО-дағы нөсер жаңбыр салдарынан тұрғын үйлер су астында қалып, газ құбырлары зақымданды - ҚР ТЖМ
АСТАНА. 23 маусым. ҚазАқпарат - Оңтүстік Қазақстан облысының Төле би ауданындағы Леңгір қаласы мен Көксаяқ ауылында болған нөсер жаңбыр салдарынан тұрғын үйлер су астында қалды.
ҚР ТЖМ хабарлағандай, Көксаяқ ауылында 20 аула учаскесі, ал Леңгір қаласында 10 аула учаскесі су астында қалған. Төтенше жағдайдың салдарын жоюға ОҚО ТЖД жеке құрамның 85 адамы мен 4 техникасы және 1 мотопомпасы, жергілікті халықтан 110 адам мен 4 техникасы жұмылдырылған. Қаза болғандар мен зардап шеккендер жоқ.
Кеше кешке Жаңа ұйым ауылы маңында жауған нөсер салдарынан таудағы Леңгір өзені арқылы өтетін жуандығы 57 мм орташа қысымдағы газ құбыры 4 жерден зақымданған. Осының кесірінен 8 шкафтық реттеу пункті мен жеке сектордың 700 абонентіне газ жеткізілмей қалды. Жөндеу-қалпына келтіру жұмыстары бүгін таңертең басталды.
