ОҚО санавиациясына жыл басынан бері 365 қоңырау келіп түскен
«Санитарлық авиацияның қалалық жедел жәрдемнен өзіндік айырмашылығы бар. Орталық мамандары жеке тұлғалардан түскен қоңырауды қабылдамайды. Аймақтағы ауруханалар өтініші бойынша ғана жұмыс істейді. Оның өзінде науқасқа жергілікті жерде көмек көрсету мүмкін болмаса ғана шұғыл топ аттанады», делінген жазбада.
Облыстағы санитарлық авиациялық бөлімде 10 жедел жәрдем көлігі мен бір ұшақ, бір тікұшақ бар. 30 қызметкер қалтқысыз еңбек етеді. Ал келіп түскен шақыртуға тасымал құралын бөлу науқастың диагнозына және қоңырау түскен аумаққа тікелей байланысты.
Әрбір секунды қымбат салада қызмет ететіндерін ұшқыштар да жақсы түсінеді. Сол себепті өздеріне жүктелген міндетті мінсіз атқаруға тырысады.
Мирахмад Османов, ұшқыш: «Дәл қазіргі қонуымыз сәтті өтті. Науқас діттеген жеріне дер кезінде жетті. Шалғайдағы ауылдан ауруды аман жеткізу, оларға көмек көрсетіп отырған дәрігерлер тағдыры әуеде бізге жүктеледі. Сондықтан қателесуге жол жоқ.»
Науқас шұғыл жеткізілген тікұшақ Еврокоптер деп аталады. 2014 жылы шығарылған әуе кемесі төтенше жағдай комитетінің «Қазавиаспас» АҚ-на тиесілі. Тікұшақ соңғы 2 айдан бері шұғыл шақыртуларға ұшып, дәрігерлердің қолқанатына айналған. Іші де заманауи үлгіде жабдықталған.
«Сонымен, өңірлік санитарлық авиация бөлімі 2015 жылы 4 250 шақырту алған. Оның 30 пайызы әуе тасымалы арқылы жасалса, қалған жетпіс пайызы арнайы көлікпен жеткізілген. Ал 2016 жылдың алғашқы айында 365 науқас санитарлық авиациялық бөлім мамандарының көмегіне жүгінген. Ақ халаттылардың бұл қызметі тегін көрсетіледі», делінген жазбада.