Өнеркәсіп министрлігі Азиада формасы сапасына тексеру жүргізе ме
Жуырда Азиада спартакиадасы спортшыларына арнайы тігілген форма сынға ұшырады. Проблема – сапада. Оған кім жауапты? Осыған орай Өнеркәсіп және құрылыс министрі Қанат Шарлапаев пікір білдірді, деп хабарлайды ҚазАқпарат тілшісі.
«Азиада спартакиадасындағы спортшылардың формасына қатысты бізге шағым түскен жоқ. Өнімнің сапасына келсек, тапсырысты спорттық іс-шараны ұйымдастыруға жауап беретін орган өз бетінше жүзеге асырады. Сондықтан біздің министрлік жеткізушіні таңдауда нақты сапаны тексеруді жүргізбеді. Өйткені, бұл құзырлы министрлік пен өнеркәсіптің арасындағы жағдай», - деді Қанат Шарлапаев Үкімет отырысынан кейін болған баспасөз мәслихатында.
Оның айтуынша, өнеркәсіп саласында мемлекеттік стандарттар бар. Аталған нарық жоғары бәсекеге қабілетті.
«Қазіргі уақытта біздің министрлікке ешқандай арыз-шағым түскен жоқ. Өз басым, тексеру амалдары мүдделі тараптардан өтініш түскен кезде ғана жүргізіледі деп ойлаймын», - дейді ведомство басшысы.
Еске салсақ, қазақстандық спортшы Азиада формасының сапасын сынға алған еді.
Кейін Туризм және спорт министрлігі отандық спортшыларға дайындалған форманың сапасына қатысты ресми түсініктеме берді.
