Оңтүстік Қазақстанда ұшақ құрастырылатын болады
ШЫМКЕНТ. Қаңтардың 12-сі. ҚазАқпарат /Татьяна Пылаева/ - «Оңтүстік» әлеуметтік-кәсіпкерлік корпорациясы Оңтүстік Қазақстан облысында шағын авиация құру және Шымкентте ұшақ құрастыру өндірісін іске қосу жөніндегі жаңа жоба әзірлеп жатыр.
Қазақстанның оңтүстік өңірінде шағын авиация үш бағытта: санитарлық авиация, ауыл шаруашылығы авиациясы және жолаушылар тасымалы бағыттарында құрылмақ.
«Біз ресейлік «Авиациялық технологиялар және композиттер» арнайы конструкторлық бюросы» компаниясына шықтық. Компания бізге жалпы мақсаттағы авиацияның жаңа көпмақсатты «Ту-410» (навигатор) ұшағын ұсынып отыр. Қазіргі уақытта фирма Мәскеу авиациялық институтының жанында осынау жаңа ұшақты сынақтан өткізуде»,- дейді жобаның кураторы, «Оңтүстік» әлеуметтік-кәсіпкерлік корпорациясы инновациялық даму департаментінің директоры Ғани Қарабеков.
«Оңтүстік» әлеуметтік-кәсіпкерлік корпорациясы ресейлік компаниядан осы маркалы әуе техникаларын шығару жөніндегі жобаны сатып алып, Ресейден жеткізілетін құрамдас бөлшектерден Шымкентте, жергілікті әуежайдың базасында ұшақтарды құрастыруды жоспарлауда. Бұл жұмыспен корпорацияның еншілес кәсіпорны - «Оңтүстік-авиа» фирмасы айналысатын болады.
