Оңтүстік Корея Қазақстанмен бірлескен зерттеу институтын құруға 16 млн доллар бөледі

АСТАНА. KAZINFORM — Satbayev университетінің ғалымдары ойлап тапқан әдіспен алынған селеннің алғашқы партиясынан 1,3 млрд теңге табыс келген.

Бұл жайында Ғылым және жоғары білім министрі Саясат Нұрбек Үкімет отырысында мәлім етті.

— Вакуумдық дистилляция әдісімен селен өндіру жобасы туралы ақпаратты өткенде таратқанбыз. Satbayev University-дің Металлургия және кен байыту институты Балқаштағы «Қазақмыс Прогресс» кәсіпорнымен бірлесіп, селенді тазарту әдістемесін енгізді. Тұңғыш партиямыз 1,3 млрд теңге табыспен экспортқа шықты, — деді ол.

Министр осы жетістікті әрі қарай жетілдіру үшін Оңтүстік Кореямен бірлескен институтын құрылатынын атап өтті.

— Осы институтымыз Оңтүстік Кореяның Ұлттық сирек металдар институтымен бірігіп, арнайы ғылым институтын құру туралы келісімшартқа қол қойды. 16 млн доллар инвестиция саламыз деп жоспарлап отыр. Осы мамыр айында ашылу керек. Біз бұл мәселелерді пысықтап, Жоғары ғылыми-техникалық комиссияның қарауына шығарамыз, — деді Саясат Нұрбек.

Министрдің айтуынша, елдегі 25,5 мың ғалымның 54 пайызы — 40 жастан асқандар.