Оңтүстік Кореяның премьер-министрі президенттің міндетін атқарушы қызметіне қайта оралды

АСТАНА. KAZINFORM – Оңтүстік Кореяның премьер-министрі Хан Док Су өзінің қызметіне және президенттің міндетін атқарушы лауазымына қайта тағайындалды. Бұл шешім елдің Конституциялық соты Ұлттық ассамблеяның импичмент туралы өтінішін қабылдамағаннан кейін қабылданды, деп хабарлайды Euronews.

Конституциялық сот жеті дауысқа қарсы бір дауыспен Ханның пайдасына шешім шығарды.

Хан желтоқсан айының ортасында уақытша мемлекет басшысы болды. Ол қызметке президент Юн Сок Ёльдің 3 желтоқсанда төтенше жағдай енгізгені үшін қызметінен шеттетілуінен кейін келді.

Юнның бұл шешімі елде саяси дағдарыс туындатты. Төтенше жарлыққа қол қойылғаннан бірнеше сағат өткен соң, депутаттар парламентке жиналып, бұл шешімді жоюға дауыс берді.

14 желтоқсанда Юнға импичмент жарияланды.

Алайда, Хан Док Су Конституциялық соттағы бос орындарға үш судья тағайындаудан бас тартқаны үшін екі аптадан кейін оның өзіне де импичмент жарияланған еді.

Дүйсенбі күні қызметіне қайта оралғаннан кейін, Хан журналистерге алғысын білдіріп, Конституциялық соттың шешімін «даналық шешім» деп атады.

«Еліміздің дамуы — басты басымдық. Сол үшін біз солшыл немесе оңшыл болып бөлінбеуіміз керек», — деді ол.

Бұған дейін Оңтүстік Кореяның оппозициялық партиялары президенттің міндетін атқарушыға импичмент жариялау туралы өтініш бергені хабарланған еді.