ОПЕК+ мұнай көлемін нарыққа кезең-кезеңімен қайтарудың кестесіне түзету енгізеді

АСТАНА. KAZINFORM – Бүгін ОПЕК+ Бірлескен министрлік мониторинг комитетінің (JMMC) 59-шы отырысы бейнеконференция форматында өтті. Отырысқа Қазақстан атынан қатысқан Энергетика министрі Ерлан Ақкенженов ресми Астана ОПЕК+ аясындағы келісімдерді ұстана беретінін мәлім етті.

Комитет отырысында ОПЕК+ келісіміне қатысатын елдердің 2025 жылдың қаңтар-ақпан айларында өз міндеттемелерін орындау көрсеткіштері қарастырылып, жаһандық мұнай нарығындағы қазіргі үрдістер талқыланды.

— Комитет мұнай экспорттаушы сегіз елдің нарық тұрақтылығын қолдау үшін өндіріс көлемін ерікті түрде қысқартқанын жоғары бағалап, барлық міндеттемелерді толық орындау үшін өтемақы жүргізудің аса маңызды екенін атап өтті.

Қазақстан делегациясы ОПЕК+ аясындағы 3 сәуірде өткен кездесуге де қатысты. Бұл жиында ерікті қысқартуға үн қосқан сегіз мемлекет, оның ішінде Қазақстан да, нарық жағдайына бірлескен бағалау жүргізді. 3 сәуірдегі кездесу қорытындысы бойынша мұнай көлемін нарыққа кезең-кезеңімен қайтарудың бұрын келісілген кестесіне түзету енгізу туралы шешім қабылданды.

Қазақстан ОПЕК+ аясындағы келісімдерді ұстануды жалғастырып, халықаралық міндеттемелер мен ұлттық мүдделерді басшылыққа ала отырып, альянс серіктестерімен сындарлы өзара іс-қимылды жалғастырады, - деп жазылған министрліктің ресми мәлімдемесінде.

Еске салсақ, бір ай бұрын ОПЕК+ елдері сәуірден бастап мұнай өндіру көлемін арттыруға уағдаласқан болатын.