Орал қаласында экономикалық белсенді тұрғындар саны 120 мың адамға жетті
ОРАЛ. 3 ақпан. ҚазАқпарат /Елжан Ералы/ - Орал қаласында өткен жылы жұмысқа тұруға өтініш білдіргендер саны 2010 жылғыдан 26 пайызға азайып, 7185 адамды құрады.
Қала әкімдігінен түскен мәліметке қарағанда, соның 3567-сі жұмысқа орналасты. 1702-сі қоғамдық ақылы жұмыстарға, 599-ы кәсіптік оқуға жіберілді. Жастар тәжірибесіне 655 адам жолдама алса, соның 282-сі «Бизнестің жол картасы-2020» бағдарламасы бойынша барды.
«Жұмыспен қамту-2020» бағдарламасына орай құрылған қалалық жұмыспен қамту орталығы екі бағытта жұмыс жасауда. Бірінші бағыт бойынша 350-ден астам қала тұрғыны білім алуда. Олар сосын жұмысқа орналасатын болады. Екінші бағыт бойынша 10 адам «Даму» Қоры арқылы кәсіпкерліктің қыр-сырын үйренді. Биыл бизнес жобалары бойынша бес жыл мерзімге 3 млн. теңгеге дейін несие беру қарастырылады.
Жыл ішінде жоспардағы 4841-дің орнына 5248 жаңа жұмыс орны ашылды. Қаланың экономикалық белсенді тұрғындары 3 пайызға көбейіп, 120 мың адамға жетті.
