Оралда Азиада жеңімпаз-жүлдегерлеріне құрмет көрсетілді

ОРАЛ. 14 ақпан. ҚазАқпарат /Елжан Ералы/ - 7-қысқы Азия ойындарына қатысып, таяуда ғана ел қоржынын бір алтын, қос қоламен толықтырған батысқазақстандық жүлдегер спортшыларды 14 ақпанда облыс әкімінің бірінші орынбасары Нұрлан Ноғаев арнайы қабылдады.

Қабылдау рәсіміне жеңімпаз спортшылардан басқа олардың жаттықтырушылары мен спорт ұжымдарының басшылары, қала әкімі Самиғолла Оразов қатысты.

Кездесу барысында Нұрлан Асқарұлы құрлықтың ең үлкен сайысының маңызына тоқталып, Азиада жеңімпаздарын толағай табысымен құттықтады. Бұдан соң жеңімпаздар мен жүлдегерлер әкімшілік тарапынан марапатталып, оларға ақшалай сыйлық табыс етілді. Команданың жеңіске жетуіне зор еңбек сіңірген допты хоккейден Қазақстан құрамасының және «Ақжайық» командасының бас бапкері Алексей Никишовке жаңадан салынатын үйлердің бірінен екі бөлмелі пәтер берілетін болды.

Облыс әкімдігінің спортшыларға көрсеткен сый-құрметіне ризашылығын білдірген допты хоккейден облыстық федерация президенті Яхия Чудров жасанды мұз айдыны салынса, Оралда спорттың осы түрінен әлем чемпионатын өткізуге болатынын айтты.