Оралда еріген қар суына байланысты тұрғындардан өтініш көбейе түскен
ОРАЛ. KAZINFORM – Батыс Қазақстан облысында еріген қар суы тұрғындарды алаңдатып отыр. Тұрғындар әлеуметтік желіге жүктеген бейнежазбаларында аула-көшелерді су басқанын айтып, дабыл қағып жатыр.
Орал қаласында «Құс фабрикасы» аталып кеткен «Зачаганский» бау-бақша серіктестігінде ата-аналар су жолдың үстімен ағып жатқандықтан, мектепке тасымалдайтын автобусқа бастауыш сынып оқушыларын жеткізу мүмкін еместігін хабарлаған.
Орал қаласы әкімдігінен алынған мәліметке қарағанда, 8 наурыздан бері тұрғындардан 266 өтініш түскен. Соның ішінде бүгін таңнан бері қабылданған 87 өтініш бойынша су сору жұмыстары жүргізіліп жатыр.
Қарғын басталғаннан бері облыс орталығында 46 мыңнан астам текше метр су сорылған.
Қалаға қарасты Зачаган кентінде Орал-Саратов трассасы жанындағы арна арқылы су қатты ағып жатыр. Еріген қар суын кедергісіз өткізу, арнадан асып кетуін болдырмау мақсатында 13 наурыз күні мұнда ТЖМ қызметкерлері жұмыс істеді.
БҚО ТЖ департаменті баспасөз қызметінен түскен мәліметке қарағанда, осы тұстан 5 мың текше метрдей су сорылып, айдалды. Жағдай бақылануда.
Сол секілді Бәйтерек ауданы Белес ауылында бір үйді су басу қаупі төнгендіктен, жол бойында уақытша көліктер тоқтатылып, су ағызу жұмысы жүргізілген. Бұл туралы ауыл адамдары мәлімдеді.
— Әзірге қауіп жоқ. Су басудың алдын алдық, — деді Kazinform тілшісіне Белес ауылдық округінің әкімі Бақытгүл Жүнісова.
Өңірде соңғы күндері қар күрт еріп жатқандықтан, қауіп әлі сейіле қойған жоқ.
Еске сала кетейік, бұдан бұрын БҚО-да Деркөл өзеніндегі су деңгейі бір тәулікте 130 сантиметрге көтерілгенін жазған болатынбыз.
