Оралда күйші-композитор Т.Шәмеловтің жаңа кітабының таныстырылымы болды

ОРАЛ. Қыркүйектің 9-ы. ҚазАқпарат /Ғайсағали Ералы/ - Хамза Есенжанов атындағы облыстық балалар мен жасөспірімдер кітапханасында белгілі күйші-композитор, Қазақстан халық әртісі Тұяқберді Шәмеловтің «Тырналар» атты кітабының таныстырылымы болды,

деп хабарлайды ҚазАқпарат тілшісі.

Т.Шәмелов - елге күйшілігімен қоса әндерімен де танымал өнерпаз. Әсіресе, оның «Тырналар» әні кезінде кеңінен таралды. Осы аттас кітабына автордың бұрынғы туындыларымен қоса жаңа шығармалары енгізілген. Олардың ішінде батысқазақстандық ақындардың сөздеріне жазылған әндер де бар.

Кітаптың тұсаукесер кешінде композитор алдағы жоспарларымен бөлісіп, белсенді оқырмандарға қолтаңбасын қалдырды. Шара барысында Құрманғазы атындағы мемлекеттік академиялық қазақ ұлт аспаптар оркестрінің әртістері де өнер көрсетті.