03:04, 06 Сәуір 2025 | GMT +5
Оралда вагондар жөнделетін ғимарат өртенді
ОРАЛ. KAZINFORM — Орал қаласында темір жол станциясы аумағында орналасқан ғимараттың (ангар) шатыры отқа оранды.
БҚО ТЖ департаментінің баспасөз қызметінен мәлім еткеніндей, оқиға 5 сәуір күні түскі сағат 13.21-де болды.
— Аумағы 150 метрді қамтыған «тілсіз жау» сағат 14.23-те оқшауланып, 14.43-те жойылды. Зардап шеккендер жоқ. Ангар ішінде вагондар болған. Өрт сөндірушілердің үйлесімді және кәсіби сауатты іс-қимылы нәтижесінде жалын таралмай, вагондарға тиген жоқ. Алдын ала болжам бойынша от өрт қауіпсіздігі ережелерін сақтамаудан шыққан. Қазіргі кезде оқиғаның мән-жайы анықталып жатыр, — деп хабарлады ведомстводан.
Еске сала кетейік, бұдан бұрын БҚО-да биыл 3 айда 135 өрт оқиғасы тіркелгенін жазған болатынбыз.
