Оралда жаңа алаң салынуда (ФОТО)
ОРАЛ. ҚазАқпарат - Орал қаласында Қадыр Мырза Әлі атындағы мәдениет және өнер орталығы жанында, 5-інші және 7-шағынаудандар аралығында орналасқан жаңа алаң салынуда.
Құрылыс барысымен танысқан шаһар басшысы Алтай Көлгіновтің айтуынша, өңірлерді дамыту бағдарламасына және қаланың бас жоспарына сәйкес қолға алынған жоба құны - 1,483 млрд. теңге. Қаржының 90 пайызы республикалық, қалғаны жергілікті бюджеттен бөлінген. Құрылысы өткен жылы басталған жаңа алаңдағы жұмыстар 85 пайызға орындалған. Мұнда су атқанда, түрлі-түсті түске бөленетін ауқымды субұрқақтар, 4 ротонда, басқа да көрікті орындар болмақшы.
Жаңа алаңды алдағы жылдың бірінші тоқсанында пайдалануға беру көзделуде. Абаттандырылатын аумақ көлемі 7 гектардан асады, ол үш бөлікке бөлінген. Қадыр Мырза Әлі атындағы орталық жанында театр-ойын-сауық, екіншісінде ресми шаралар өтетін көп деңгейлі әкімшілік, үшіншісінде саябақ алаңы орналаспақ. Жаңа алаң гүлзарлар, әдемі тал-теректермен көмкерілмек.
Мердігер ұйым «Марасант» ЖШС бас директоры Аманжол Көнеевтің сөзіне қарағанда, алаң жаңа технологиялар негізінде салынуда. Оның жарықтандырылуының өзі ерекше болмақшы. Сондай-ақ жеті субұрқақтың әрқайсысының ұзындығы 377 метр болса, судың көтерілу биіктігі 14 метрге жетеді. Жобалаушы мамандар Мәскеуден шақырылған. Төрт ротонда да алаңға көрік беріп тұрмақ.
