Оралдың «Ақжайығы» «Волга-2» командасын тағы да екі рет ұтты
ОРАЛ. Ақпанның 13-і. ҚазАқпарат /Ғайсағали Ералы/ - Допты хоккейден Ресей чемпионаты бірінші лигасы екінші тобында ойнайтын Оралдың «Ақжайығы» кезекті кездесулерін Ульяновскіде «Волга-2» командасымен өткізді,
деп хабарлайды ҚазАқпарат тілшісі.
Бұдан бұрын «Ақжайық» бұл команданы өз айдынында ірі есептермен жеңген болатын. Оралдықтар сырт айдында да көп қинала қойған жоқ. Бірінші кездесу 7:1 есебімен аяқталса, екіншісінде де «Ақжайық» ширақ ойнап, 5:2 есебімен қарсыласын тізе бүктірді.
Қазіргі кезде 43 ұпай жинаған «Ақжайық» ақпанның 14-15-інде Воткинскіде «Знамя» командасымен күш сынасып, содан кейін өз айдынына оралады.
