Оралға қала күніне орай Төреғали Төреәлі мен Ерке Есмахан келмек
ОРАЛ. ҚазАқпарат - Оралда биыл қала күніне арналған негізгі мерекелік шаралар 2-10 қыркүйек аралығына жоспарланып отыр. Бұл туралы өңірлік коммуникациялар қызметінің алаңында Орал қаласы әкімінің орынбасары Мирболат Нұржанов мәлім етті, деп хабарлайды «ҚазАқпарат» тілшісі.
Оның айтуынша, түрлі байқауларға қоса 2 қыркүйек күні Жайық өзені жағалауында «Жайық сазы» дәстүрлі өнер фестивалі болмақ. Келесі күні Салтанат сарайы жанында «Автотюнинг шоу» шарасы өтсе, 4-10 қыркүйекте отандық фильмдер көрсетілімі апталығы болмақ. 6 қыркүйекте Қадыр Мырза Әли атындағы мәдениет және өнер орталығының амфитеатрында Орал қаласы әкімінің кубогына арналған КВН, келесі күні қалалық мәдениет және демалыс саябағында «Домбыра PARTY» фестивалі өтеді. 
8 қыркүйек күні Орал қаласы әкімінің кубогы үшін волейболдан «Достық-Дружба» халықаралық турнирі басталып, кешкісін П.Атоян атындағы стадионда Қазақстанның эстрада жұлдыздары Төреғали Төреәлі, Ерке Есмахан және Сон Паскальдың қатысуымен концерттік бағдарлама қойылады.
9-10 қыркүйек күндері облыстық қазақ драма театрында «Орал аруы - 2017» байқауының жеңімпаз-жүлдегерлері анықталып, шағын сәулеттік пішіндер мен мүсіндер ашылады. Жайық өзеніне бекіре балықтары жіберіліп, ауыл шаруашылығы жәрмеңкесі өткізіледі. Ал қала күніне арналған ретро-фестивальға Қарақат Әбілдина мен Қыдырәлі Болман қатысады.
