Оралмандардың төлемақысын жалған құжатпен алып отырған қылмыскерлер құрықталды - Қаржы полициясы

АСТАНА. Қыркүйектің 9-ы. ҚазАқпарат /Арман Асқаров/ - Қаржы полициясы органдары мемлекеттен әлеуметтік төлемақы ретінде бөлінген бюджет қаражатын ұрлау оқиғаларын анықтады. Бұл туралы бүгін ҚР Экономикалық қылмысқа және сыбайлас жемқорлыққа қарсы күрес агенттігінің ресми өкілі Мұрат Жұманбай мәлім етті,

деп хабарлайды ҚазАқпарат.

Оның айтуынша, Атырау облысында К. есімді әйел азаматтың ісі сотқа жіберілді. Ол медициналық-әлеуметтік сараптаманың жалған актісі негізінде туберкулезге шалдыққандардың 2-топ мүгедектігін алған. Осының нәтижесінде жалпы сомасы 1 млн. 200 мың теңгенің бюджеттік қаражатын заңсыз иеленген. Ал Солтүстік Қазақстан облысында 3 азаматқа қатысты қылмыстық іс айыптау қорытындысымен прокуротураға жіберілді. Олар жалған төлқұжаттар мен туу туралы куәліктер арқылы оралмандарға төленетін жәрдемақыны алып отырған. Бюджетке келген шығын -  1 млн. 300 мың теңге.

Сондай-ақ Маңғыстау аудандық ауруханасының бұрынғы бас бухгалтері Ш. Рамазанова және Зайсан қаласы мектеп-интернатының бас бухгалтері Т. Тоғанасова 2,5 млн теңге көлеміндегі қаражатты жымқырғаны үшін шартты түрде бас бостандығынан айырылды.