Өскемен ғалымдары жасап шығарған титан импланттар отаға қолданыла бастады

АСТАНА. KAZINFORM – Ғылым және жоғары білім министрі Саясат Нұрбек Үкімет отырысынан кейін өткен баспасөз мәслихатында титаннан жасалған отандық импланттарды таныстырды.

- Біз титан өндіруден әлемде жоғары орында тұрғанымызбен, одан жасалатын бұйымдар мен құралдардың 90 пайыздайын сырттан әкелеміз. Сондықтан Шығыс Қазақстан техникалық университеті Өскемендегі Үлбі металлургиялық зауытымен бірігіп, титаннан медициналық бұйымдар жасай бастады. Бізге денсаулық сақтау министрлігі өте үлкен қолдау білдірді. Өйткені медициналық бұйымдарды сертификаттау, клиникалық тестілеу процестері көп. Астанадағы Н.Бәтпенов атындағы Ұлттық травматология және ортопедия ғылыми орталығы осы бұйымдарды тез арада клиникалық тестілеуден өткізіп, 91 ота жасады. Екі бұйым толыққанды сертификаттаудан өтті. Оның бірі – жамбас буынына арналған диск. Бұл бұйыммен 20 ота жасалды. Екіншісі – омыртқа сақинасы. Осы күнге дейін 25 отаға қолданылды, - деді ол.

Саясат Нұрбектің айтуынша, титан – биологиялық инертті материал. Яғни, денеге кіріктірілгенде реакция бермейді, шірімейді.

- Жалпы Шығыс Қазақстан техникалық университеті титаннан 20-дан астам бұйым жасап шығарды. Оның екеуі сертификаттаудан өткенін айттық. Тағы төрт бұйым клиникалық тестілеудің ақырғы кезеңдерінен өтіп жатыр. 14 бұйым клиникалық тестілеуге енді кіреді. Қазірдің өзінде жасалған бұйымдар титан импланттарға деген ішкі қажеттіліктің 10 пайызын жабады. Алдағы 3-4 жылда толық 100 пайыз жабамыз деген есебіміз бар, - деді министр.

Министрдің айтуынша, елдегі 25,5 мың ғалымның 54 пайызы — 40 жастан асқандар.