Өскеменде биыл 60-тан астам күн жел соқпай, қаланы түтін басып тұрды

ӨСКЕМЕН. KAZINFORM – Өскемен қаласында жыл басынан бері 62 күнде қолайсыз метеорологиялық жағдай тіркелді.

Қалада желсіз күндері автокөліктер мен кәсіпорындар шығаратын ластаушы заттардың ауаға таралуы жиілейді. Сондықтан «Қазгидромет» РМК халыққа алдын ала қолайсыз метеорологиялық жағдай қалыптасқаны жайлы ескертіп отырады.

- 2025 жылы Өскеменде осындай 62 күн болған. 2020 жылы - 78, 2021 жылы - 42, 2022 жылы - 99, 2023 жылы - 124, 2024 жылы - 100 күнде қолайсыз метеорологиялық жағдай тіркелді, - делінген ақпаратта.

Мамандар осындай күндерде далада ұзақ жүрмеуге, пәтердегі терезелер мен желдеткіштерді жабуға, қайнатылған, тазартылған немесе газсыз минералды су мен шәй ішуге кеңес береді. Сондай-ақ тамақ рационына құрамында пектині бар азық-түліктерді қосқан жөн.

Еске салсақ, кеше елдегі 7 қалада ауа сапасы нашарлаған болатын. 

Ботакөз Кенжеханқызы