Өскеменде қоқыс полигонындағы ірі өрт 24 сағаттан кейін сөндірілді
ӨСКЕМЕН. ҚазАқпарат – Өскемен қаласында қоқыс полигонындағы ірі өрт сөндірілді, деп хабарлайды ҚазАқпарат тілшісі.
ШҚО Төтенше жағдайлар департаменті баспасөз қызметінің мәліметіне сүйенсек, өрт 26 сәуірде сағат 12:00 шамасында басталған. Құтқарушылар арнайы техникалармен сол жерде тәулік бойы жұмыс істеді. Төбе боп үйілген қоқыс пен жел жаңадан өрт ошақтарын тудырып, сөндіруді қиындатқан.
«Бүгін сағат 12.15-те қызыл жалын толықтай сөндірілді. Өртенген аумақтың ауданы 1 гектарды қамтыған», - деп хабарлады ведомство өкілдері.
Айта кетейік, оқиға орнына барлығы 40 адам мен 14 техника жұмылдырылған. Алдын ала мәлімет бойынша жалынның шығуына – қасақана өрт қою немесе отты абайсыз пайдалану себеп болуы мүмкін.
Естеріңізге сала кетсек, осыған дейін Өскеменде қоқыс полигоны өртеніп жатқанын хабарлаған болатынбыз.
