Өскеменде жұмыс уақыты кері шегерілген соң автобустардың жүру кестесі өзгере ме

ӨСКЕМЕН. KAZINFORM – Өскеменде жұмыс уақытының бір сағатқа кері шегерілуі қоғамдық көліктердің жүру кестесіне өзгеріс әкелмейді.

20 наурыздан бастап қаладағы мемлекеттік органдар мен бюджеттік ұйымдардың жұмыс уақыты сағат 08.00-ден басталып, 17.30-да аяқталуда. Осыған орай ел арасында автобустар жүру кестесін өзгерте ме деген сұрақ туындады. Бұл сауалға Өскемен әкімі Алмат Ақышов жауап берді. 

- Қоғамдық көліктер таңғы сағат 06.00-де қатынай бастайды. Сондықтан жұмыс уақытының шегерілуі автобустардың жүру кестесіне әсер етпейді. Десе де қазір туындап отырған бір мәселе - таңғы қарбаластағы көлік қозғалысының қарқындылығы. Егер бұрын 7:30-бен 8:30 аралығында кептеліс болса, енді бұл уақыт өзгеруі мүмкін. Сол үшін тасымалдаушылар жолаушылар ағынына байланысты автобус санын арттырып отырады, - деді әкім. 

Айта кетейік, әзірге қаладағы мектеп оқушыларының сабақты сағат нешеден бастайтынына қатысты нақты шешім шығарылған жоқ.

Еске салсақ, бұған дейін Өскеменде жұмыс уақыты 1 сағатқа шегерілгені хабарланған.