Францияның оңтүстік-шығысында 400-ден астам өрт сөндіруші тілсіз жаумен күресіп жатыр
ПАРИЖ. KAZINFORM – Францияның оңтүстік-шығысындағы Дром департаментінде бір аптаға жуық уақыттан бері жалғасып жатқан орман өртін әлі де толық сөндіру мүмкін болмай отыр. Бұл туралы Анадолы хабарлайды.
Жергілікті БАҚ мәліметінше, ел аумағындағы өрттердің басым бөлігі бақылауға алынған. Алайда Дром департаментінің Дьёа қаласында жалын шамамен 400 гектар аумақты шарпыған.
Өртті сөндіру жұмыстары кезінде төрт өрт сөндіруші жеңіл жарақат алды. Тілсіз жаумен күреске 400-ден астам маман жұмылдырылған. Оларға төрт тікұшақ және/немесе амфибиялық ұшақ көмектесіп жатыр.
Буш-дю-Рон департаментінің Фонвьей қаласындағы өрт кеше бақылауға алынды.
Францияның метеорологиялық қызметі 17 департаментте өрт қаупі жоғары екенін ескертті.
Сонымен қатар Météo-France елде аптап ыстықтың жаңа толқыны басталғанын хабарлады. Осыған байланысты 22 департаментте температура қаупінің «қызғылт сары» деңгейі жарияланды.
Биыл Франция тарихындағы ең ауқымды өрт қаупі маусымын бастан өткеріп жатыр. Өрт салдарынан елде 117 мың гектар аумақ жанып кетті.
Осыған дейін Францияда орман өрттерінің беті қайтқаны туралы жарияланған еді.
