Пәкістанның Карачи қаласында лаңкестік әрекеттің салдарынан 31 адам қаза тапты
Бұл туралы жергілікті полицияға сілтеме жасап ИТАР-ТАСС агенттігі хабарлаған.
Лаңкес-жанкештінің бомбаны шиит-мұсылмандардың Мұхамед пайғамбардың немересі имам Хусейнді еске алу құрметіне ұйымдастырған Ашура рәсімі кезінде іске қосқаны бұдан бұрын хабарлаған болатын. Куәгерлердің айтуынша, құрбандар саны бұдан да көп болуы мүмкін еді - Құдай сақтап, жанкешті топтың ортасына өте алмай, бомбаны қапталдас тұйық көшелердің бірінде іске қосқан.
Рәсімге қатысқан және лаңкестіктен кейін қандары қайнаған шииттер жақын маңдағы құрылыстарды қирата бастаған. Оқиға орнында 50-ден астам дүкен мен сауда нүктелеріне жайылған өрт әлі өршіп тұр.
Елдің құқық қорғау органдары, бұл лаңкестік әрекеттің пәкістандық экстремист-тәлібтердің ісі болуы мүмкін екенін айтады. Бірақ та, шабуылға сүннит-мұсылмандардың лаңкестік ұйымдарының да қатысы болу мүмкіндігі жоққа шығарылмай отыр.