Пәкістан БҰҰ Қауіпсіздік Кеңесінің шұғыл отырысын өткізуді сұрады
АСТАНА. KAZINFORM - Пәкістанның БҰҰ-дағы тұрақты өкілі Үндістанмен шиеленістің күшеюіне, Джамму мен Кашмирдегі соңғы оқиғаларға және аймақтық қауіпсіздік мәселелеріне байланысты әлемдік ұйымның Қауіпсіздік Кеңесінің шұғыл отырысын өткізуді сұрады. Бұл туралы Report ақпарат агенттігінің америкалық бюросына Пәкістан миссиясының өкілі Аманат Әли айтты.
Оның айтуынша, аймақтық жағдайдың нашарлауы және Үндістан мен Пәкістан арасындағы шиеленістің күшеюі аясында, әсіресе аймақтық және халықаралық бейбітшілік пен қауіпсіздікке үлкен қауіп төндіретін Джамму мен Кашмирдегі жағдайға байланысты Пәкістан БҰҰ Қауіпсіздік Кеңесінің шұғыл жабық консультацияларын өткізуді ресми түрде сұрады.
Пәкістанның БҰҰ-дағы тұрақты өкілі Асим Ифтихар Ахмед дүйсенбі күні түстен кейін Қауіпсіздік Кеңесінің отырысынан кейін мәлімдеме жасайды.
Айта кетейік, 22 сәуірде Үндістанның бақылауындағы Джамму және Кашмир аймағының Пахалгам ауданында қарулы адамдардың туристерге оқ жаудыруы салдарынан 26 адам қаза тауып, бірнешеуі жараланған болатын.
