Пәкістанда жол апатынан кемінде 11 адам қаза тауып, тағы 10 адам жарақат алды

АСТАНА. KAZINFORM — Қайғылы оқиға жексенбі күні таңертең Пәкістанның оңтүстігіндегі Синд провинциясындағы Ұлттық тасжолда болған, деп хабарлайды Синьхуа.

1122 құтқару қызметінің мәліметінше, апат Хайрпур округінде тіркелген.

Шығыстағы Пенджаб провинциясынан оңтүстіктегі портты қала Карачиға бағыт алған жолаушылар автобусы бетон балкалар тиеген тіркемемен соқтығысқан.

Қаза тапқандардың арасында тоғыз жолаушы, жүргізуші және кондуктор бар.

Марқұмдардың мәйіттері мен жарақат алғандар жақын маңдағы ауруханаға жеткізілді.

Осыған дейін ақпан айының басында Пәкістан астанасы Исламабадтағы шейіттер мешітінің маңында болған жарылыстан кем дегенде 31 адам қаза тапқаны анықталды.