Парламент Жетісу облысында ірі жел электр станциясын салу туралы құжатты қарайды
АСТАНА. KAZINFORM — Парламент Мәжілісінің қарауына «Қазақстан Республикасының Үкіметі мен Сауд Арабиясы Корольдігінің Үкіметі арасындағы жел электр станциясы жобасын іске асыру туралы келісімді ратификациялау туралы» заң жобасы келіп түсті.
«Аталған келісімге екі елдің үкіметі 2024 жылғы 7 наурызда қол қойды. Келісім мақсаты — Қазақстан аумағында жаңартылатын энергия көздерін, „жасыл“ технологиялар мен инновацияларды пайдаланып, екі ел арасындағы ынтымақтастық аясында жаһандық жылынуға қарсы шараларды жүзеге асыру. Осы құжат бойынша жалпы қуаты 1 ГВт жел электр станциясы жобасын Жетісу облысында салу жоспарланған», — деді Мәжіліс депутаты Еділ Жаңбыршин палатаның жалпы отырысында.
Жобаны іске асыру аясында 250-ге тарта тұрақты жұмыс орнын ашу, 3 мыңға жуық уақытша жұмыс орнын құру ескерілген.
«Шамамен 1,8 млрд АҚШ доллары сомасында инвестиция тарту қарастырылған. Мәжілістің Экология мәселелері және табиғат пайдалану комитеті заң жобасы бойынша қорытынды әзірлеуге дайын», — деді депутат.
Еске салсақ, биыл наурызда Саудияның ACWA Power компаниясы директорлар кеңесінің төрағасы Мұхаммед Абунайян Жетісу облысында қуаты 1 ГВт болатын жел электр станциясын салу жөніндегі бірлескен инвестициялық жобаның перспективалары, сондай-ақ Қазақстанмен «жасыл» энергетика саласындағы өзара ықпалдастық жоспары жайында айтты.
