Партия тарапынан жүргізіліп жатқан тұрақты рейдтер, сауалнама іс-шаралары ең алдымен бағалардың негізсіз көтерілуіне жол бермейді ? Б. Әбдішев

АСТАНА. Наурыздың 3-і. ҚазАқпарат /Құралай Жолдыбаева/ - Бүгін «Нұр Отан» ХДП Орталық аппаратында партияның Мониторинг және әлеуметтік-экономикалық бағдарламалар департаментінің директоры Бауыржан Әбдішевтің, партияның Үкіметтегі өкілі Владимир Дворецкийдің, партияның ресми өкілі Оксана Петерстің қатысуымен баспасөз мәслихаты өтті,

деп хабарлайды ҚазАқпарат тілшісі.«Нұр Отан» ХДП үстіміздегі жылғы ақпанның 5-інен бастап күн сайын негізгі тамақ өнімдерінің бағасына және ақпанның 17-сінен бастап дәрі-дәрмектерге аптасына екі рет мониторинг жүргізуді қолға алды. Ақпанның 13-іне дейін жүргізген бақылауда 18 тұтыну өнімі қамтылса, ақпанның 14-інен бастап тұтыну өнімінің тізбесі 35 атауға дейін көбейді», - деп атап өтті Бауыржан Әбдішев.Сондай-ақ брифингте дәрі-дәрмектер тізбесі 56 атауды құрағандығы айтылды. Республика бойынша партия филиалдары әкімдіктермен, ҚР Парламенті Мәжілісінің депутаттарымен және барлық деңгейдегі мәслихат депутаттарымен бірлесе бұқаралық ақпарат құралдарының насихаттауымен дәріханаларда және көтерме-бөлшекті сауда кәсіпорындарында рейд жүргізді. «Бағалар мониторингІ бойынша жүргізіліп жатқан жұмыс өзінің оң нәтижесін беруде. Партия тарапынан жүргізіліп жатқан тұрақты рейдтер, сауалнама іс-шаралары ең алдымен бағалардың негізсіз көтерілуіне жол бермейді. «Нұр Отан» партиясының ҚР Үкіметімен, даму институттарымен және коғамдық ұйымдармен дөңгелек үстел өткізу, меморандумдарға қол қою түріндегі бірлескен жұмыстары оң нәтижесін беруде», - дейді партияның Мониторинг және әлеуметтік-экономикалық бағдарламалар департаментінің директоры.