Павлодар облысында мамандар Ертістегі балықтың қырылуына қатысты болжам айтты
Бүгні Павлодар облыстық тұтынушылар құқығын қорғау департаментінің қызметкерлері аталған оқиғаға қатысты дереу шара қабылдап, су сынамасын зертханаға жібергенін және зерттеу нәтижесіне қатысты болжам жасалғанын хабарлады.
Мамандардың айтуынша, Ертіс суының қауіпсіз екені анықталды. Май, Лебьяжі аудандары мен Ақсу қаласындағы Ертіс өзенінен алынған сынама нәтижелері бойынша зерттеу мұны растады.
«Судағы қорғасын, мырыш, мыс, фтор және темір мөлшері нормативті көрсеткіштен аспайды, - деді облыстық тұтынушылар құқығын қорғау департаменті басшысының міндетін атқарушы Ирина Сорокина.
- Зерттеу кезінде ерітілген оттек мөлшерінің азайғаны, органикалық ластанғаны байқалды. Балық бойынша зерттеу нәтижелері жұма күні алынады», - деді И.Сорокина.
И.Сорокина Балықтар судағы оттегінің азаюы салдарынан қырылуы мүмкін деген болжам айтты.
«Балықтардың қырылуына әсер етуі мүмкін тағы бір жағдай - Шүлбі СЭС-тан суды төгу кезіндегі механикалық әрекет. Атап өту керек, суэлектростансасынан суды төгу су түсін өзгертуі мүмкін. Өңірлік орман шаруашылығы және жануарлар әлемі инспекциясы өкілдерінің пікірінше, кей өсімдіктердің гүлденуі кезінде тозаң өзенге түсіп, су түсінің өзгеруіне әсер етуі де мүмкін», - деді ол.