Павлодарда 10 күннен соң жылу сөндіріледі

ПАВЛОДАР. KAZINFORM — Облыс орталығындағы жылу желілерін сынақтан өткізу 15 сәуірден басталады.

Биыл өңірде 16,1 млрд теңгеге 31 шақырымнан астам желіні жаңарту жоспарланып отыр.

Павлодар облысының үш қаласында 10 күннен соң орталықтандырылған жылу өшіріліп, желілерде температуралық және гидравликалық сынақтар басталады.

— Павлодар қаласында ең жоғары температуралық сынақтар 15 сәуірден, беріктікке сынау 24 сәуірден басталады. Екібастұзда температуралық сынақтар 15 сәуірден, гидравликалық сынақтар 17 сәуірден жоспарланған. Ал Ақсуда температуралық сынақтар 16 сәуірден бастап, гидравликалық сынақтар 21 сәуірден бастап жүргізіледі. Жылыту маусымы алдындағы сынақтар 28 шілдеден 6 тамыз аралығында жоспарланған, — деп хабарлады өңір әкімінің баспасөз қызметінен.

Жалпы облыста 2024-2025 жылдардағы жылыту маусымы штаттық режимде өткен. Апаттық жағдайлар орын алған жоқ. Бұған негізінен өңірде қатты аяздардың болмауы оң әсер еткен. Тұрғындардың жылуға қатысты шағымы 55%-ға азайған.

Энергетика және тұрғын үй-коммуналдық шаруашылық басқармасының басшысы Ержан Иманзаиповтың ақпараты бойынша өңір тұрғындарын сапалы жылумен қамтамасыз ету үшін, сондай-ақ, алдағы жылыту маусымында жылу желілеріндегі гидравликалық және температуралық режимдерді жақсарту үшін 16,1 млрд теңгеге 31 шақырымнан астам желіні жаңарту жоспарлануда. Павлодарда № 5 сорғы станциясын салу, 5 км магистральдық жылу желілеріне, 10,6 км орам ішіндегі желілерге күрделі жөндеу жүргізу көзделген. Екібастұзда ЖМ-2 және ЖМ-7 қайта жаңартылады және жылу желілері күрделі жөндеуден өтеді. Ақсу қаласының № 3, 5, 8 шағын аудандарының квартал ішіндегі жылу желілері қайта жаңартылып, жылу желілеріне күрделі жөндеу жүргізіледі. Облыстың энергия көздерінде 46 негізгі жабдықты жөндеу, 394 дербес және орталықтандырылған қазандықтарды жөндеу жұмыстары жоспарланған.

Еске сала кетейік, Ертіс-Баян өңіріндегі жылу желілерінің 79,7%-ы тозып тұр.