Павлодарда 1200-ден астам көпқабатты үй жылуға қосылды
ПАВЛОДАР. KAZINFORM — Павлодар қаласында жылыту маусымы басталғалы әлеуметтік нысандар жылумен толықтай қамтылған. Көпқабатты тұрғын үйлерді орталықтандырылған жылу жүйесіне қосу жұмыстары да аяқталу кезеңінде.
Қалада әлеуметтік нысандар мен жеке секторды орталықтандырылған жылу жүйесіне қосу жұмыстары 14 қыркүйекте басталған. Қала әкімдігінің мәліметінше, қазіргі уақытта барлық әлеуметтік нысан жылумен қамтылған.
— Көпқабатты тұрғын үйлер мен жылу энергиясының өзге де тұтынушылары үшін жылыту маусымы 28 қыркүйекте басталды. Бүгінде Павлодардағы 1342 көпқабатты тұрғын үйдің 1202-сі жылу жүйесіне қосылды, — деп хабарлады қала әкімдігінен.
Қалған көпқабатты үйлерді жылу жүйесіне қосу жұмыстары белгіленген кестеге сәйкес жалғасып жатыр.
Еске сала кетейік, Павлодарда жылу жүйесіндегі апаттарды анықтайтын цифрлық жүйе енгізіліп жатыр.
