Павлодарда ауыл тұрғындары пайдаланып отырған понтонды көпір өзенге батып кетті
ПАВЛОДАР. KAZINFORM - Ақсу қаласының Көктас ауылы маңында Белая өзені арқылы өтетін понтонды көпір суға батып кетті. Жергілікті билік өзеннен адамдар мен техникалардың өтуі үшін уақытша паром қатынасын ұйымдастырады.
Бұл туралы Ақсу қаласының әкімі Нұрлан Дүйсембинов хабарлады.
– Көктас ауылы маңында, Белая өзенінен өтетін понтонды көпірі суға батып кетті. Алғашқы кезекте шаруа қожалықтары мен кәсіпорындардан техникалар тарту арқылы оны шығарып алу және жөндеу жоспарланып отыр, – деді шаһар басшысы.
Сондай-ақ ол адамдар мен техникалардың қарама-қарсы жағалауға өтуі үшін паромдық өткелдер ұйымдастырылатынын жеткізді.
Ауыл адамдары аталған көпірді пайдаланып шөп шабу және тасу жұмыстарын жүргізеді. Жаңа понтон көпірін салу үшін жобалық-сметалық құжаттама әзірлеуге жергілікті бюджеттен қаражат бөлінді.
