Павлодарда бір апта бұрын із-түзсіз кеткен жігіттің денесі көлігімен бірге су астынан табылды

None
Фото: instagram.com/pavlodar_tjd/z
ПАВЛОДАР. ҚазАқпарат - Бір аптадан астам уақыт бұрын түсініксіз жағдайда жоғалып кеткен Руслан Леонтьевтің денесі табылды, деп хабарлайды ҚазАқпарат.

Павлодар облысы ТЖД мәліметінше, кеше, 25 маусымда Ертіс өзеніндегі іздеу жұмыстары кезінде 4 құтқарушы эхолоттың көмегімен шамамен 5 метр тереңдіктен және жағадан 10-15 метр қашықтықтан көлікті тапқан.

Сүңгуір суға кіріп, көліктің су астында жатқанын растады.

Арнайы техниканың көмегімен машина жағаға көтеріліп, 102 қызметіне берілді.

Салонның ішінен Руслан Леонтьевтің мәйіті табылды.

Ол 16 маусымда жоғалып кеткен. Сол күні «Мазда» көлігімен Заңғар ауылынан Семей тасжолына қарай шығып кеткен.

Русланды іздеумен «Вита» еріктілері, полиция қызметкерлері, ер адамның туыстары мен достары айналысты.

Кейінірек волонтерлер Русланның жоғалғанға дейінгі соңғы сағаттарын өткізген жерді белгіледі. Оны іздеуге эхолот, сарбаздар мен иісшіл иттер жұмылдырылды.


Соңғы жаңалықтар