Павлодарда қазан айынан бастап электр энергиясы мен ауызсудың тарифтері өзгереді
ПАВЛОДАР. KAZINFORM - Павлодарда қазан айынан электр энергиясының тарифі біршама өсіп, ал ауызсумен жабдықтау қызметі керісінше арзандайды.
Табиғи монополияларды реттеу комитетінің Павлодар облыстық департаментінің басшысы Нұрлан Нұрмұратовтың айтуынша, жеке тұрғындар үшін электр энергиясының тарифі қосылған құн салығын есептемегенде 1 кВт/сағ үшін 1 теңгеге немесе 5 пайызға өседі. Бұл өзгеріс «Павлодарэнерго» акционерлік қоғамы үшін электр энергиясын сатып алу құнының қымбаттауына байланысты енгізіледі.
- Егер алдағы уақытта электр энергиясын сатушы немесе тасымалдаушы компаниялар бағаны көтермесе, бұл тариф 2027 жылғы қыркүйекке дейін қолданылады, – деп түсіндірді департамент басшысы.
Сонымен қатар, Павлодарда ауыз судың тарифі төмендейді. 1 қазаннан бастап жеке тұрғындар үшін бір текше метр судың құны 97 теңгеден 92 теңгеге дейін (ҚҚС-сыз) кемиді.
Департаменттің мәліметінше, «Павлодар-Водоканал» ЖШС инвестициялық бағдарлама аясында алған міндеттемелерін толық орындамаған. Осыған байланысты кәсіпорынға өтемдік тариф енгізілген.
- Бұл тариф келесі жылдың қыркүйегіне дейін қолданылады. Себебі уақытша өтемдік тариф 12 ай мерзімге енгізіледі. Бұдан бөлек, халық үшін су бұру тарифі 1 теңгеге төмендейді, - деп қосты департамент басшысы.
Ал жылу тарифі 2026 жылдың соңына дейін өзгермейді. Оның құны 1 Гкал үшін 4078 теңге (ҚҚС-сыз) деңгейінде сақталады.
Бұған дейін Атырауда электр энергиясы мен жылу тарифі өзгеруі мүмкін екенін жазғанбыз.
