Павлодардағы Аймауытов театры Оралхан Бөкейдің «Кербұғысын» сахнаға шығарды
ПАВЛОДАР. KAZINFORM - Пластикалық драмада қорықтағы маралдар мен бұғылардың өмірі баяндалады. Негізгі идеяда адамзат жауыздығының үстемдігі көрініс тапқан.
Павлодардың Аймауытов атындағы қазақ музыка-драма театры биылғы жылдың алғашқы премьерасын ұсынды. Премьераның атауы - «Кербұғы», Оралхан Бөкейдің аттас әңгімесінің желісімен қойылып отыр.
Жаңа қойылымда қорықтағы маралдардың табиғатпен етене тіршілігі, олардың адамдарға деген тым сенгіштігінің салдарынан құрбандыққа айналуының жайы сипатталады.
Бұғылар мен маралдар табынының адамзат әлемінен үнемі жылылық іздеп, тым сенгіштігі бұл жануарларды құрдымға құлатты. Кербұғы бұғылардың ішінде ең ақылдысы еді. Ол пенде баласын шексіз сүйетұғын. Қойылым шырқау шегіне жеткенде мамыражай тірлік кешіп жүрген топ басы – Кербұғының он сегіз салалы мүйізін ел-жұрттан безініп, айдалада жүрген адам Қоңқай кесіп әкетті.
Кербұғының бар бағы – басындағы он сегіз салалы мүйізі екен. Одан айрылған сәттен оны тыңдайтын, пәрменіне құлақ асатын жануар қалмады. Оның соңын ала үлкен бір маралдар әулеті күйреп тынды. Қазақтың басынан өткен барлық қайғы-қасіретті осы жерге үйе салғандай. Аштық көрінісі, бақа-шаян теріп кеткен жұрт, сәбиінен айрылған ана, көкірегі шерге толған ерлер... Көшбасшыдан, тамырынан ажыраған елдің бейшара кейпі.
Айтып өтейік, соңғы уақытта керекулік театр пластикалық мәнерге көбірек көңіл бөліп жүр. Актерлер ұжымының дені жастар, шетінен мың бұралған бишілер, қажет болса күрделі трюктерді де орындайтынын байқап жүрміз. Бұрын театрдан адам көңілінің жоғын іздеп баратын, ал қазіргі көрермен көбірек әсер күтеді екен.
Драма режиссері Жангелді Садықовтың сөзінше, адам мен табиғат арасындағы қарама-қайшылық ұғымдарын жастар қауымы кеңінен түсіне білуі керек. Ересектер мен жас ұрпақтың зердесіне экологиялық тәрбиені сіңдіруде мұндай қойылымдардың пайдасы зор болмақ.
Премьералық қойылымдағы басты рөлдерді Жасұлан Әмірхан, Темірлан Мұқатай сияқты жас актерлер сомдады. Театрдың белді әртісі, ҚР мәдениет қайраткері Бейбіт Шәнім Қоңқай рөлін еш кіршіксіз ойнап шықты.
