Петропавлда газ баллонының жарылуынан шыққан өрт кезінде 20 тұрғын қауіпсіз аймаққа көшірілді, күйіп қалған екі адам ауруханаға жеткізілді
АСТАНА. 4 маусым. ҚазАқпарат - Петропавл қаласында Жамбыл көшесі бойында орналасқан 2 қабатты тұрғын үй пәтерінің бірінде түнгі сағат 00.52-де, асханада тұрмыстық газ баллонынан сыртқа жайылған ауа газ қоспасы атылды.
Бұл туралы ҚР ТЖМ-нің баспасөз қызметі хабарлады.
Өрт сағат 01.20-да сөндірілді. Тілсіз жауды ауыздықтауға ҚР ТЖМ Солтүстік Қазақстан облысы бойынша ТЖД өртке қарсы қызметінің 7 адамы мен 1 техникасы жұмылдырылды. 20 адам, оның ішінде 4 бала қауіпсіз аймаққа көшірілді.
Орын алған өрттің салдарынан 35 жастағы ер адам мен 29 жасар әйелді күйік шалды, олар ауруханаға жеткізілді.
