Петропавлда Назарбаев зияткерлік мектебі СҚО-ның ІІД-мен ынтымақтастықты ретке келтірді
ПЕТРОПАВЛ. ҚазАқпарат - Петропавлда химия-биология бағытындағы Назарбаев зияткерлік мектебінде 400-ден астам оқушы білім алуда. СҚО ІІД бастығы Берік Біләловтің бастамасымен бұл білім мекемесінде алдын алу кабинеті ашылды.
Бұл туралы ведомствоның баспасөз қызметінен хабарлайды.
«Петропавлдағы Назарбаев зияткерлік мектебінде Қазақстанның түрлі қалаларынан, сондай-ақ облыс аудандарынан келген жасөспірімдер білім алуда. 140 оқушы жатақханада, жүзге жуығы - туыстарының үйінде немесе жалдамалы пәтерлерде тұрып жатыр. СҚО ІІД бастығы Берік Біләловтің бастамасымен бұл білім беру мекемесінде алдын алу кабинеті ашылды», - делінген хабарламада.
Кәмелеттік жасқа толмағандардың ісі бойынша инспектордың міндеті - құқықтық сауаттылықты арттыру, құқықтық сананы нығайту, қауіпсіздік шараларын оқыту, сондай-ақ мектеп ортасындағы құқық бұзушылықтардың алдын алу.
«Аталған білім мекемесінің қаланың шалғайдағы аудандарының бірінде орналасқанын есепке ала отыра, мектеп инспекторының міндеттерінің бірі - ондағы қауіпсіздікті қамтамасыз ету. Сондай-ақ жоспарда жол қозғалысы жас инспекторларын дайындау, мектепте жоспарланған әлеуметтік жобаларға көмек көрсету», - деп атап өтті СҚО ІІД бастығының орынбасары Қайрат Оразалин.
Петропавл қаласындағы «Назарбаев зияткерлік мектебі» директорының орынбасары Гүлжан Жақанованың атап өтуінше, бірлескен шаралар жоспары белгіленіп қойды, оған сондай-ақ қызметте жоғары табыстарға жеткен полиция бөлімшелерімен кездесулер өткізу енгізілген.
