Петропавлда түрлі жарақат алған 4 жасар баланың анасы әлеуметтік желіде көмек сұрады
ПЕТРОПАВЛ. KAZINFORM – Петропавлда қолы сынып, түрлі жарақат алған 4 жасар бүлдіршінге қатысты сотқа дейінгі тергеу басталды. Анасы баланың баспалдақтан құлағанын айтқан. Дәрігерлер болса, бүлдіршінді біреудің аяусыз ұрғанын айтып, полицияға хабарлады.
Солтүстік Қазақстан облысы полиция департаменті баспасөз қызметінің мәліметінше, 23 қыркүйек күні Петропавлдағы емдеу мекемелерінің бірінен хабарласып, 4 жасар баланың түрлі дене жарақатымен түскенін айтқан.
ҚР Қылмыстық кодексінің «кәмелетке толмағанға қатысты денсаулыққа қасақана ауырлығы орташа зиян келтiру» бабы бойынша сотқа дейінгі тергеу басталды.
Бұл оқиғаға қатысты СҚО білім басқармасы да түсінік берді.
«Облыстық көпбейінді балалар ауруханасы мен Петропавл қалалық полиция басқармасынан қызметтік хат келді. 2020 жылы туған М. аурухананың травматология бөліміне қолының оң жақ сүйектерінің жабық сынуымен, кеуде қуысының, арқасының, жамбастың және т. б. жерлерінің көгеріп, зақымдануымен түскен. Кәмелетке толмаған М. анасымен бірге шұғыл түрде ауруханаға жатқызылды.
Травматолог дәрігердің қорытындысына сәйкес, балада ұрып-соғу іздері бар: басында гематомалар, оң иықта, арқада, екі бөкседе, екі жамбаста, тізе буындарында көгерулер анықталды.
Қазіргі уақытта кәмелетке толмаған М.-ға дене жарақатын салған адам анықталмаған. Кәмелетке толмағанға дене жарақатын келтіру фактісі бойынша оның анасы Щ. толық мәлімет бермейді, айтуынша, кәмелетке толмаған өзіне абайсызда зиян келтірген», - делінген баспасөз хабарламасында.
Ведомство мамандарының айтуынша, ҚР ӘҚБтК-нің 127-бабы 1-бөлігі бойынша Әкімшілік құқық бұзушылық жасау фактісі бар, атап айтқанда, кәмелетке толмаған балаға қатысты қауіпсіздік шараларын қамтамасыз етпеу.
«Осыған байланысты М.-ны сотқа дейінгі тергеу жүргізу кезінде Қызылжар ауданы Архангельское ауылындағы өмірлік қиын жағдайдағы балаларды қолдау орталығына орналастыру мәселесі қаралды. Өйткені кәмелетке толмаған М.-ның анасымен бірге тұруы оның өмірі мен денсаулығына қауіп төндіруі мүмкін.
26 қыркүйекте қамқоршылық бөлімінің қызметкерлері мән-жайды анықтау үшін Щ.-ға барды. Әйел балалардың әкесімен қарым-қатынас жасамайтынын түсіндірді, бұрынғы күйеуінің жүрген жері оған белгісіз, ал бала жарақаттарды құлап алғанын айтты.
Щ.-ның үлкен ұлы ата-анасының қамқорлығынсыз қалып, балаларды қолдау орталығына орналастырылды. Баланың анасына орталықтың байланыс нөмірі берілді, ата-ана міндеттерін орындауға қатысты заңнама нормалары түсіндірілді», - делінген СҚО білім басқармасының баспасөз хабарламасында.
Ал түрлі жарақат алған 4 жасар баланың анасы көмек сұрап, әлеуметтік желіде жазба қалдырды.
Бұған дейін Петропавлда 17 жастағы бозбаланы жүргінші жолағында жүк көлігі қағып кеткенін жазған едік.
