Полиция Батыс Қазақстандағы жарылысқа қатысты түсінік берді

ОРАЛ. KAZINFORM — Батыс Қазақстан облысы Бөкей ордасы ауданы аумағында тікұшақтың ұшып бара жатқаны және жарылыс болғаны туралы әлеуметтік желіде бейнежазбалар тарады.

Бейнежазбада тікұшақ ұшып, тағы да жарылыс болғаны айтылады.

БҚО полиция департаменті 24 сәуір күні шамамен сағат 20.00-де WhatsApp мессенджерінде бейне және аудиожазбаның тарағанын растады. 

— Аталған оқиғалар қоршалған әскери полигон аумағында жоспарлы іс-шараларға байланысты, елді мекеннен алыс жерде болған. Тұрғындарға қауіп жоқ. Жергілікті атқарушы органдар түсіндіру жұмыстарын жүргізіп жатыр, — деп хабарлады ведомстводан.

Ресейлік Капустин Яр әскери полигоны Бөкей ордасы ауданының бір бөлігін жалға алып, пайдаланып келе жатқаны белгілі.

Еске сала кетейік, бұдан бұрын БҚО-да тағы да ұшқышсыз ұшатын аппараттың бөлшектері табылғанын жазған болатынбыз.