Португалияда 4,7 балдық жер сілкінісі болды

АСТАНА. KAZINFORM – Жер сілкінісінің ошағы Сейсалдан оңтүстік-батысқа қарай шамамен 14 шақырым және ел астанасы Лиссабоннан 20 шақырым жерде орналасқан, деп хабарлайды Euronews.

Португалия теңіз және атмосфера институты дүмпу жергілікті уақыт бойынша 13:24-те тіркелгенін және алдын ала мәлімет бойынша, «материалдық шығын келмегенін» хабарлады.

Жер сілкінісі ел астанасында да айтарлықтай сезілген.

АҚШ Геологиялық қызметінің мәліметінше, жер сілкінісі магнитудасы 4,8 болды. Еуропа-Жерорта теңізі сейсмологиялық орталығы да магнитуданы 4,8-ге жетті деп хабарлаған.

Институт сонымен қатар «жер сілкінісінің ошағын анықтау күрделі процесс» және «әртүрлі агенттіктер сәл басқаша нәтижелер таратуы мүмкін» деп түсіндірді.

Әлеуметтік желіде тікелей эфирде Прайя-да-Фонте-да-Тельяда жер асты дүмпулері болған сәті көрсетілген видео жарияланған.

Португалияда соңғы рет өткен жылдың 26 тамызында қатты жер сілкінісі болғаны атап өтілді. Ол кезде оның магнитудасы 5,3 болған.

Қоса кетейік, Португалияда науқастар жедел жәрдемді 10 сағаттан астам уақыт күтеді.