Премьер-Министр отандық банктерді мақтады: Салық төлеуде жақсы шешімдер бар
АСТАНА. KAZINFORM – ҚР Премьер-Министрі Олжас Бектенов мемлекет пен банк секторының өзара іс-қимылын жоғары бағалады.
Бүгінгі Үкімет отырысында мемлекеттік қызметтерді дамыту және цифрландыру тақырыбы қаралды. Онда Kaspi.kz басқарма төрағасы Михаил Ломтадзе және Freedom Holding Corp бас атқарушы директоры Тимур Турлов банк жүйелерінде мемлекеттік қызмет көрсету тәртібі туралы баяндады. Олар азаматтар мен бизнес үшін мемлекеттік қызметтерді алу процесін ыңғайлы ететін негізгі жобаларын таныстырды.
Өз кезегінде О. Бектенов цифрландыру мен онлайн қызметтер саласындағы жетістіктерді ерекше атап өтті және мұның көлеңкелі экономиканы азайтуға көмектесетінін айтты.
«Мемлекет тарапынан, әрине, мемлекеттік қызметтерді әрі қарай цифрландыруды қолдаймыз. Қазіргі уақытта салық төлеу бойынша жақсы шешімдер ұсынып отырсыздар. Бұл бізге де қажет: бизнесті көлеңкеден шығару керек. Сондықтан біз бірлесіп жұмыс істеуіміз керек, – деді Үкімет басшысы.
Цифрлық даму министрлігінің деректеріне сәйкес, бүгінде Қазақстанда 1382 мемлекеттік қызмет түрі, оның 1265-і электронды форматта (91,5%), ал 117-сі қағаз түрінде көрсетіледі.
eGov арқылы онлайн қызмет көрсетуге монополия жойылып, негізгі қызметтерді танымал финтех платформаларға шығарылған. Бұл халықтың цифрлық сервистерге қолжетімділігін арттырды.
Бүгіннен бастап eGov арқылы кедергі келтірген көлік иелеріне анонимді хабарлама жіберуге болады.
Сондай-ақ, сәуірдің соңына дейін жеке куәлікті ауыстыру процесі толығымен онлайн форматқа көшіріледі.
