Президент «Теңгеге 30 жыл» мерекелік медалін бекіту туралы Жарлыққа қол қойды
АСТАНА. ҚазАқпарат – Мемлекет басшысы Қасым-Жомарт Тоқаев ұлттық валюта – теңгенің айналысқа енгізілгеніне 30 жыл толуына арналған мерекелік медальді бекіту туралы Жарлыққа қол қойды, деп хабарайды ҚазАқпарат тілшісі.
«Қазақстан Республикасының ұлттық валютасы – Қазақстан теңгесінің айналысқа енгізілгеніне 30 жыл толу құрметіне қаулы етемін:
1. «Теңгеге 30 жыл» мерекелік медалі тағайындалсын.
2. Қоса беріліп отырған:
1) «Теңгеге 30 жыл» мерекелік медалімен наградтау қағидалары;
2) «Теңгеге 30 жыл» мерекелік медалінің сипаттамасы бекітілсін», - делінген Прзидент қол қойған Жарлықта.
Құжатта көрсетілгендей, мерекелік медальді мына лауазымдағы тұлғалар Мемлекет басшысының атынан табыстауға құқылы:
- Ұлттық банк төрағасы;
- Ұлттық банк төрағасының орынбасарлары;
- Ұлттық банк филиалдарының, Ұлттық банктің Алматы қаласындағы тұрақты өкілдігінің және Ұлттық банк ұйымдарының бірінші басшылары;
- Ұлттық банктің төрағасы айқындайтын уәкілетті тұлғалар.
«Мерекелік медальмен ҚР ұлттық валютасы – Қазақстан теңгесінің және ҚР қаржы жүйесінің дамуына және нығаюына, ҚР мемлекеттілігінің қалыптасуына және әлеуметтік-экономикалық дамуына елеулі үлес қосқан ҚР азаматтары және шетел азаматтары наградталады», - делінген құжатта.
