Прокурорлар 5 мыңға жуық жұмысшының 245 миллион теңге жалақысын өндіріп берді

АСТАНА. Наурыздың 5-і. ҚазАқпарат /Айдар Оспаналиев/ - Ақпанның 24-і мен наурыздың 4-і аралығында еліміздің прокурорлары 5 мыңға жуық жұмысшының құқын қорғап, олардың 245 миллион теңге жалақысын өндіріп берді.

Бұл туралы бүгін апталық брифингте Бас прокуратураның ресми өкілі Сапарбек Нұрпейісов мәлім етті, деп хабарлайды ҚазАқпарат. Оның айтуынша, 2 мыңға жуық азаматтың жалақылары прокурорлардың ұйғарымымен берілген. Бұл соманың құны 79 миллион теңгені құрап отыр. «Сондай-ақ прокурорлар аталмыш мерзім ішінде жалақыны өндіріп беруге байланысты 230 миллион теңгенің прокурорлық актілерін енгізген. Бұл 4 мыңнан астам жұмысшының құқықтарына байланысты мәселе. Олардың арасында 3,5 мыңнан астам жұмысшының 215 миллион теңгесіне қатысты 5 ұйғарым бар», - деді ресми өкіл.