Риддердегі жылу электр орталығын қалпына келтіру жұмыстары кестеге сай жүріп жатыр

ӨСКЕМЕН. ҚазАқпарат – Шығыс Қазақстан облысы Риддер қаласындағы жылу электр орталығының жұмысы қалпына келтірілуде, деп хабарлайды ҚазАқпарат тілшісі.

Риддердегі төтенше жағдай бойынша құрылған жедел штабтың мәліметіне сәйкес, жылу электр орталығындағы жөндеу-қалпына келтіру жұмыстары кестеге сәйкес жүргізілуде. Қазіргі уақытта орталықтағы агрегаттарды реттеу үшін Өскемен және Согра ЖЭО энергетиктері мен арнайы мамандары келді.

«Бүгінгі таңда ЖЭО-дағы №1, № 3 орташа қысымды қазандық және жоғары қысымды №6 қазандық жұмыс істеп тұр. Жоғары қысымды № 4 қазандықты автоматтандыру бойынша жөндеу жұмыстары жүргізілуде. Жуық арада осы агрегатты қалпына келтіру жұмыстары аяқталады», - делінген ақпаратта.

Орталықта 260 тонна мазут бар. Жылу желісіндегі температура 55/42 градусты құрайды.

«Бүгін Риддердегі мектептер мен балабақшалар офлайн режимде жұмыс істей бастады. Оқу орындарында сабақтар 30 минутқа және қоңырау 5 минутқа дейін қысқартылды», - делінген хабарламада.

Ашық көздерден алынған фото