Рим Папасы Францискке екі жақты пневмония диагнозы қойылды

АСТАНА. KAZINFORM — Рим Папасының денсаулық жағдайы тағы да нашарлады, деп хабарлайды Euronews. 

Ватикан сейсенбі күні кешке понтификке астматикалық бронхит фонында дамыған екі өкпесінің пневмониясы диагнозы қойылғанын хабарлады.

— Зертханалық сынақтар, кеуде қуысының рентгенографиясы және Қасиетті Әкенің клиникалық жағдайы күрделі картинаны көрсетіп отыр, — делінген хабарламада.

Францисктің антибиотикалық терапия жүргізіліп жатқаны нақтыланды. 

Олай болғанымен, Ватиканның баспасөз хатшысы Маттео Брунидің айтуынша, понтификтің көңіл-күйі жақсы.

Еске сала кетсек, жағдайы нашарлаған Рим Папасы емін ауруханада жалғастыратынын жазған болатынбыз.

Хабарланғандай, 88 жастағы понтификке тыныс жолдарының полимикробтық инфекциясы диагнозы қойылды, ол «ауыр клиникалық жағдайды» шешу үшін оның емделуін өзгертуді талап етті.