С гепатитін жұқтырған лейкемиямен ауыратын балалардың аналары «Өмірді сақтап қаламыз!» атты қоғамдық бірлестік құрмақ
АСТАНА. Ақпанның 12-сі. ҚазАқпарат /Гүлмира Әлиакпарова/ - Лейкемиямен ауыратын балалардың аналары қатерлі дертке көпшіліктің назарын аудартып,
оның алдын алуда өз тәжірибелерімен бөлісу үшін Қоғамдық бірлестік құрмақ. Олар Қазақстанды Онкологиялық ауруларға шалдыққан балалар ата-аналарының халықаралық конфедерациясына мүше етуге ниетті, деп хабарлайды ҚазАқпарат.
Бүгін Астанадағы «Бәйтерек» медиа-орталығында, алдағы ақпанның 4-і және 15-і күндері атап өтілетін - Дүниежүзілік ракқа қарсы күн мен Онкоауруларға шалдыққан балалардың халықаралық күні қарсаңында, Қазақстан бойынша лейкемиямен ауыратын балалардың ата-аналары бас қосып, баспасөз мәслихатын өткізді.
Олар қатерлі ауруларға шалдыққан балаларға берілуі тиіс әлеуметтік мәртебе жайында, жеңілдіктермен және дәрі-дәрмектермен қамтамасыз етілуі мен өңірлердегі науқастар медициналық тексерістермен қиындықтарға тап болып отырғандығы тұрғысында әңгіме қозғады.
Мәселен, Қостанай облысынан 100 шақырым жерде орналасқан аудан орталығынан келген, қанның қатерлі дертіне шалдыққан 14 жастағы жасөспірімнің анасы Роза Ысмағұлова, қанның құрамына талдау жасату үшін апта сайын Алматыға баруға мәжбүр екендігін айтып отыр. Ал 2,5 жастағы бүлдіршіннің анасы Анар Садықова (Алматы) медициналық мекемелердің барлығында бұл диагноздағы балалардың қанына талдауды дұрыс жасай бермейтіндігін, сол себепті жекеменшік емханалардың ақылы қызметтеріне жүгінуге тура келетінін жеткізді. Сондай-ақ астаналық Хава Гойгова оларға берілетін квотада баланы тек ұшақпен жеткізу қажеттігі жазылғанымен, жергілікті билік органдары шығынды тек теміржол көліктері үшін ғана өтеп беретіндігін қынжыла айтты.
Аналардың сөздеріне қарағанда, рак ауруы «үкім» болып естілгенімен одан толығымен айығып кетуге болады. Бірақ ол үшін моральдық төзімділікпен бірге, материалдық үлкен шығындар қажет. Ата-аналар: «Бетпе-бет кездескен бұл аурумен оңашада қалмауымыз қажет, қоғам мен мемлекет тарапынан көмектер күтеміз», десіп, осы орайда қанның рагымен ауыратын балалары бар ата-аналардың «Өмірді сақтап қаламыз!» атты қоғамдық бірлестігін (ҚБ) құруға ниетті екендіктерін жеткізді. Олардың айтуынша, бүгінде Бірлестікке мүше болуға 39 ата-анадан өтініштер келіп түскен және оны Әділет министрлігінде ресми тіркеу үшін де барлық құжаттар әзірленіп қойған. Сондай-ақ ҚБ-ның жеке шотын ашу жоспарлануда.
ҚБ-ның жұмысы - ата-аналарды бұл дерт жайында ақпараттандыру және оның алдын алу мүмкіндігін насихаттау, психологиялық және мүмкін материалдық көмек ұсыну. ҚБ арқылы ата-аналар Онкологиялық ауруларға шалдыққан балалар ата-аналарының халықаралық конфедерациясына кіруге ұмтылмақ. Себебі, қатерлі дертпен ауыратын балалары бар ата-аналардың дүниежүзілік желісі болып табылатын аталмыш Конфедерацияның негізгі бағыты - ата-аналарға өздерінің тәжірибелерімен бөлісуге және ықпалдасуға мүмкіндік беруге бағытталған.
Айта кетейік, осы ата-аналар 2009 жылдың соңында балалары Педиатрия және балалар хирургиясы ғылыми орталығында С гепатитін жұқтырды деп дабыл қаққан еді. Алайда Денсаулық сақтау министрлігінің жанынан құрылған арнайы комиссияның тексеріс нәтижелері, вирусты Педиатрия орталығында және Қан құю орталығынан жеткізілген қан мен қан құрамдауыштарынан жұқтыру мүмкіндігін жоққа шығарған болатын. Дегенмен, бүгінгі баспасөз мәслихатында ата-аналар комиссияның бұл шешімімен толығымен келіспейтіндерін қадап айтты.
