SAQ жобасына қатысушылар тексерістен өтті

АСТАНА. KAZINFORM – Астанадағы №101 орта мектептен өрт шықты. Балалар тез арада ғимараттан қашып үлгерді. Мұғалімдер мен оқушылардың төтенше жағдайға әзірлігін тексеруге арналған оқиға желісі осылай өрбіді.

Jibek joly арнасы жазғандай, тілсіз жау тұтқұйылдан соққанда тез әрекет ету керек екенін балалар жақсы түсінеді. Сондықтан дабыл қосылған бойда бәрі далаға шықты.

Ал, олардың дайындығын пысықтау үшін Сaravan knowledge корпоративтік қоры былтыр SAQ жобасын іске қосқан еді. Арнайы оқудан 200-ден аса мұғалім өтті. Солардың бірі — Гүлнұр Төлегенова.

— ​Оқу жылға созылды. Бірнеше модуль бойынша дайындалдық. Онлайн әрі офлайн білім алуға болады. Үйренгеніміз де, үйренеріміз де көп, — дейді ол.

Жоба «Шеврон» компаниясының қолдауымен, Ұлттық еріктілер желісінің әзірлеуімен іске қосылған. Мектепте өрт болған жағдайда, оқушылар стандарт бойынша 6 минутта ғимараттан шығып үлгеруі керек. Ал, бұл жолғы оқу-жаттығу кезінде көрсеткіш 5 минутқа да жетпеді. Яғни, SAQ-ты оқып, сақтыққа үйренгендер кез келген апатқа дайын.

— ​Естеріңізде болса, 2024 жылы Алматыда су тасқыны мен жер сілкінісі болды. Сол кезде дайындықты күшейту керек екенін түсіндік. Содан серіктестерімізбен жаңа жоба жасап, ойымыз іске асты. Қазір арнайы стандарттарды меңгеру үшін оқушылар мен мұғалімдерге жағдай жасаудамыз, — дейді «Шеврон» компаниясының әлеуметтік инвестициялар бойынша кеңесшісі Лейлә Айтмұханова.

SAQ жобасы оқытудың инновациялық компоненттерін енгізумен ерекшеленеді. Заманауи цифрлық технологияларды пайдалану оқушылар мен мұғалімдерге материалды жақсырақ түсініп, игеруге көмектесті.

Айта кетейік, Алматыда 6 қабатты әкімшілік ғимараты өртенді.