Saraylım Tarım түрік компаниясы Қазақстанда 5000 тонналық көкөніс қоймасын салады

АСТАНА. KAZINFORM — Ауыл шаруашылығы министрі орынбасары Ермек Кенжеханұлы «Saraylım Tarım» компаниясының Басқарма Төрағасы Ылыджа Мустафамен кездесу өткізді.

Кездесу барысында екі тарап инвестициялық жобаларды іске асырудағы ынтымақтастық мүмкіндіктерін талқылады.

Saraylım Tarım — Түркия Республикасында жеміс пен көкөніс сақтау саласында жетекші компания саналады.

Кәсіпорын қоймаларының сыйымдылығы — жылына 14 мың тонна жеміс-жидек, ал, өңдеу қуаты — жылына 35 мың тонна.

Saraylım Tarım өнімдері әлемнің 18 еліне экспортталады. Компания қуаты 5 мың тонна көкөніс қоймасын салуға мүдделі.

Сондай-ақ сірке суы мен көкөніс консервісін өндіруді жолға қою ниеті бар. Жобаға салынған инвестиция сомасы — 15 млн АҚШ доллары.

Ылыджа Мустафа жоба Алматы облысында іске асырылатынын, оған Қазақстандық серіктес анықталғанын хабарлады.

Өз кезегінде вице-министр инвесторларға көрсетілетін мемлекеттік қолдау, көзделген субсидиялар, жеңілдіктер мен преференциялар туралы айтып берді.

«Ауыл шаруашылығы министрлігі жобаны іске асыруға барынша жәрдем көрсетуге дайын», — деп атап өтті Ермек Кенжеханұлы.