Сәтбаев қаласында баланы қағып кетіп, ізін суытқан жүргізуші ұсталды

ҚАРАҒАНДЫ. 30 мамыр. ҚазАқпарат - Қарағанды облысының Сәтбаев қаласында 8 жастағы қыз баланы қағып кетіп, оқиға орнынан ізін суытқан 28 жастағы жүргізуші қолға түсті.

Бұл туралы аймақтағы ІІД баспасөз қызметінен хабарлады.

«29 мамыр күні сағат 21.05-те Сәтбаев қаласынан 1,5 шақырым жерде Жезқазған-Сәтбаев тас жолында жол-көлік апатының белгілерімен 8 жастағы қыз баланың мәйіті табылды. Сәтбаев қалалық ІІБ жол полициясы бөлімі қызметкерлерінің жедел іздестіру шараларының барысында Ұлытау көшесіндегі гараждар маңында «Мерседес Бенц-280» көлігінің тізгінінде отырған 28 жастағы жігіт құрықталды», - деп көрсетілген хабарламада.

Күдікті уақытша ұстау оқшаулағышына қамалды. ЖКА бойынша қылмыстық іс қозғалып, тергеу жұмыстары қолға алынды. Жүргізуші өз кінәсін мойындап отыр.